以往小米手机都係以「高性价比」作为卖点，千零二千一部机规格已经贴近其他品牌四五千蚊嘅机种。去到今年嘅小米5，除咗一贯高规格但价格又合理之外，今次机身造工更加係再上一层楼，睇上去已经会感觉到係顶级手机。

设计造功佳  兼备陶瓷「尊享版」

同以往咁多代小米手机最明显唔同嘅地方，笔者相信就係呢部小米5畀人第一眼睇落去嘅感觉。除咗后面用真3D双曲面玻璃造，镜头亦冇凸出，感觉更加完美无瑕。前边5.15吋屏幕亦係超薄边设计，而前下方指纹感应又冇令到要上下方造得特别厚，再加上机身只有7.25mm厚，无论喺边个角度睇都係咁「顶级」。另外，今次小米5特设「尊享版」，机背改用硬度更强嘅微晶锆纳米陶瓷製造，唔用机壳直接「裸跑」都唔惊会易整花，拎上手感觉会更「温润」（即係冇咁冷冰冰同埋冇咁跣）。笔者就亲自拎过上手，结论係贵几旧水，值嘅。

跑分性能超卓

小米5用上最新嘅Qualcomm S820处理器，係现时已公布手机CPU之中最强嘅。配合3GB LPDDR4（尊享版有4GB），速度比之前S810嘅机种快一倍以上，据官方讲呢部机安兔兔跑分可以去到14万分以上，完全係另一个层次。不过同时都係据厂方讲，呢粒CPU比上一代S810耗电量低一半，而小米5内置电量高达3,000mAh，应该够用一日有余。真係唔够用都唔紧要，因为呢部机支援埋Quick Charge 3.0技术，充电速度比上一代再提升20%，紧急时问人借到电源充10分钟已经够救命！

4G+最高600Mbps

除咗处理效能够劲，值得一提嘅係呢部机支援4G+网络同3 x CA及高阶调制技术，最高下载速度可以高达600Mbps，比唔少人屋企宽频更快，不过当然要网络商支援先得啦。另外佢配备VoLTE技术，任何时候有来电亦唔怕会影响到下载速度。

四轴光学防震

前面有提到机背嘅主镜头冇凸出，原来佢竟然仲内置四轴防震系统，比市面大部份手机镜头配置更强，防手震效果自然更好。解像度有1,600万像素，同时内置对焦速度更快嘅相位检测系统。最特别係佢感光元件设DTI技术，可以避免高反差情况下高光位置像素影响到侧边暗位像素，所以今次喺大背光同高反差嘅情况影相，会明显比其他手机更靓更仔细。

内置更多实用功能

计造工、计规格，呢部小米5真係可以话冇乜得输，不过一部好用嘅手机始终要靠软件配合。小米亦有为呢部新机加入唔少实用而好用嘅功能落，例如「像素级迁移」就可以畀用家简简单单三个步骤，将旧机嘅资料全部过晒去新机。唔单只短信、联络人嗰啲，连成部机嘅Setting、Wi-Fi密码、游戏进度等等都齐晒，完全唔使烦！另外有美颜视像通话功能，帮用家喺进行视像通话期间实时自动美颜，咁就唔怕同网友视像通话时衰样穿晒崩啦！佢仲支援埋最多四人视像通话，并且可以直接传字或者动态图。留意番，呢个其实係个App，支援Android同iOS，咁就唔怕净可以单机玩视像。其他值得一提嘅有自拍评分，可以比较相中人边个最靓仔靓女、远距锁机同追蹤等等，真心几好用。

总结

过去小米推出嘅手机虽然主打性价比，但事实係除咗规格唔错同够平之外，外型总係畀唔到人高级嘅感觉。今次小米5终于喺外型上大跃进，做到一睇就知係高阶机种。而且硬件真係好强劲，佢标配版（32GB）定价只係人民币¥1,999，高配版（64GB）及尊享版（4GB RAM + 128GB ROM + 陶瓷机背）亦分别只係¥2,299同¥2,699，即使同一众大陆品牌比较，仍然肯定係超高性价比！更何况佢手感非常之好（尤其尊享版），行货嚟到嗰阵真係可以考虑一下。

◆ 今次小米5一睇就知係高级手机。
◆ 机背咩花巧都冇。
◆ 超薄边屏幕，睇落特别靓。
◆ 机身只有7.25mm，机背仲要係双曲面。
◆ 主镜头有四轴防震但冇凸到出嚟。
◆ 仲有埋双色LED补光灯畀你。
◆ 个柜桶仔得两格，用家只可以选双SIM或单SIM加microSD。
◆ 前置指纹解锁。
◆ 小米5尊享版嘅规格。
◆ 像素级迁移功能好简单。
◆ 可实时美颜嘅多人视像通话功能。
◆ 顶吖！点解会评佢高分过笔者架！？
◆ 右边係陶瓷版，明显冇左边嘅玻璃版（普通版）咁反光。
◆ 发布会现场嘅机大约只跑到十二万分，据讲因为啲机係未Final。

小米5基本规格：

网络：GSM/GPRS/EDGE、HSPA/WCDMA、FDD-LTE、TD-LTE、4G+

作业系统：Android 6.0

屏幕：5.15吋（1,920 x 1,080像素）

处理器：Qualcomm S820

记忆体：3GB（尊享版4GB）

储存容量：32GB、64GB、128GB（尊享版）

镜头：1,600万像连补光灯（后置）、400像素（前置）

电池：3000mAh

其他功能：双卡双待、指纹辨识、Wi-Fi 802.11 a/b/g/n/ac、蓝牙4.2、GPS、GLONASS、北斗定位

体积：144.55 x 69.2  x 7.25mm

重量：129g

同场加映—小米4s

除咗小米5，小米同时公布将上年嘅旗舰机轻微升级，推出新版本小米4s。採用S808处理器、内置3GB记忆体、5吋全高清屏幕、1300万像素主镜头、指纹辨识、内置3,260mAh电池、仲支援4G+同VoLTE，但定价只係人民币1,699圆。不过听讲呢部机唔会喺香港发售，正常嘅，香港人嘅话就唔争在畀多三百几买部劲好多嘅小米5啦！

◆ 小米4s新增嘅淡紫色。
◆ 仲新增咗指纹辨识。

小米4s基本规格：

网络：GSM/GPRS/EDGE、HSPA/WCDMA、FDD-LTE、TD-LTE、4G+

作业系统：Android 6.0

屏幕：5吋（1,920 x 1,080像素）

处理器：Qualcomm S808

记忆体：3GB

储存容量：64GB（支援外置microSD卡）

镜头：1,300万像连补光灯（后置）、500像素（前置）

电池：3210mAh

其他功能：双卡双待、Wi-Fi 802.11 a/b/g/n/ac、指纹辨识、蓝牙4.1、GPS、GLONASS、北斗定位

体积：139.26 x 70.76  x 7.8mm

重量：133g